O Concello de Muros xa dispón de 50 traballadores locais contratados pola aseguradora da empresa armadora do buque Toconao, responsábel do vertido de aglomerados plásticos na nosa costa, para a retirada dos mesmos nas praias do municipio.
Muros, segundo lembra o Concello, foi a primeira administración local de Galicia en pechar coa aseguradora da empresa armadora e coas entidades de voluntariado un plan de limpeza dos pélets de plástico nas praias, que se puxo en marcha este pasado martes 9 de xaneiro.
Ante “a dimensión das tarefas”, a empresa de limpeza enviada pola aseguradora xa contratou a 50 traballadores de Muros para efectuar os traballos, coa axuda dos voluntarios, explicou o Concello.
A alcaldesa asegurou que “ante a inacción do resto das administracións decidimos buscar nós unha solución”. E engadiu: “Son uns traballos laboriosos e que levarán un tempo, porque dependen tamén de factores como as mareas, pero non podíamos esperar máis, todas as praias do concello están afectadas”, explicou María Lago, aclarando que tamén son precisas unhas tarefas de prelimpeza das praias que farán os voluntarios, para despois encargarse a empresa de limpeza da retirada dos aglomerados.
O Concello tivo coñecemento da chegada das bólas plásticas o 3 de xaneiro e o domingo 7 efectuouse unha análise da situación coa empresa de limpeza da aseguradora para decidir como proceder aos traballos.
