Os ministros de Pesca da Unión Europea alcanzaron este martes un acordo para a repartición da pesca no Atlántico e o Mar do Norte para 2024 -tamén para 2025 e 2026 no caso dalgunhas poboacións-, e para as posibilidades de pesca no Mediterráneo e o Mar Negro para 2024, un pacto que inclúe un aumento do 10,5 % das capturas de pescada para España, ata 11.000 toneladas, o que supón “a cifra máis importante do século”.
No caso de España, que nesta ocasión exerce o seu papel de presidencia do Consello, as prioridades no Atlántico eran o incremento da pescada sur, o peixe sapo ou o galo, así como o mantemento das cotas de abadexo, linguado e lagostino.
Fontes do sector sinalaron a Europa Press que o que complicou o acordo na mañá deste martes, após unha noite de negociacións, foron as reclamacións de Francia e Italia en relación co esforzo no Mediterráneo, que España buscaba tamén “amortecer”.
Mentres que a Comisión se mantiña “inflexible” na súa proposta de reducir os días de pesca nun 9, 5%, ambos os países tentaron mitigar ese recorte cun aumento dos días de compensación, que finalmente se fixou nun 5 % se se cumpren dúas das condicións -selectividade, portas voadoras, peche de zonas- e do 6 % se se cumpren tres dos requisitos.
