Ante o anuncio feito pola Xunta este 27 de decembro que marca o inicio dos trámites para o desdobre do corredor de alta capacidade comprendido entre as localidades de Noia e Brión (o proxecto da 1ª fase de conversión en autovía da vía de altas prestacións CG-1.5 que discorre entre as localidades de Brión e Noia, cun orzamento que rolda os 29 M€), A Marea de Noia emitiu un comunicado no que se critica o “incompleto dunha medida anunciada a escasos días das eleccións ao Parlamento Galego”, xa que, indican, “o curioso é que ese anuncio só afecta ao tramo Brión-Martelo, non chegando o mesmo ata a propia Noia”.
Dende A Marea poñen en cuestión “a capacidade de xestión do Goberno do PP na Xunta de Galicia, quen 14 anos despois de anunciar a licitación do proxecto non foi quen de dar un só paso adiante”. Agora, sinalan, “anuncian un parche que non da unha solución completa ao problema”.
