Para afondar nos coñecementos ancestrais do noso sector pesqueiro e marisqueiro e axudar a transmitilos, poñendo o foco na súa vertente máis sustentábel e respectuosa co medio, a comunidade de Amicos do Centro de Atención Integral de Boiro visitou este xoves e venres, 14 e 15 de decembro, as lonxas de Aguiño e Cabo de Cruz ao abeiro do proxecto Bitácora, financiado polo GALP Ría de Arousa a través da Consellería do Mar e o Fondo Europeo Marítimo de Pesca e Acuicultura (FEMPA).
Así, o xoves 14 de decembro os mozos e mozas achegáronse a Aguiño, en Ribeira, onde coñeceron da man dos mariscadores como é o día a día na lonxa, así como o traballo de separación e clasificación dos peixes e mariscos para a súa posterior venda. Ao longo da mañá, Manuel Ángel, mariscador e presidente da Confraría de Aguiño, fixo un oco para explicarlles como se desenvolve a poxa na lonxa e os segredos da pesca dos ourizos e percebes.
Ao día seguinte, o venres 15, foi a quenda de visitar a lonxa de Cabo de Cruz en Boiro. Alí a comunidade de Amicos puido afondar no funcionamento das nosas rulas e coñecer máis a fondo o proceso de pesca, separación e venda, en especial de moluscos bivalvos como as ameixas.
O obxectivo destas visitas foi coñecer en primeira persoa as técnicas de pesca que se levan a cabo no entorno do Barbanza da man de profesionais do sector pesqueiro, así como observar a importancia de respectar os ciclos naturais que garanten a sustentabilidade dos recursos mariños. Deste xeito, os amicos e amicas tiveron a oportunidade de ver o traballo que realizan coas limpezas e o coidado do ecosistema mariño e o seu efecto positivo no marisqueo e a pesca, e como este sector, á súa vez, leva a cabo prácticas para garantir que poidamos desfrutar do mar e os seus froitos, tanto no presente como de cara ao futuro.
Proxecto Bitácora
Esta iniciativa arrincou con estas xornadas para coñecer o funcionamento do distintos aspectos do sector pesqueiro da man de profesionais do mesmo. Coñecementos que a comunidade de Amicos aplicará en posteriores formacións de divulgación e sensibilización ambiental das zonas costeiras e espazos protexidos, así como na difusión sobre o patrimonio cultural vinculado ao sector pesqueiro e accións que buscarán valorizar os produtos pesqueiros da comarca.
Outros dos aspectos clave deste programa serán as sesións de sensibilización en centros educativos, xornadas de limpeza de praias e deseño de materiais gráficos e promoción in situ de produtos pesqueiros.
Ambas visitas encádranse no proxecto Bitácora, financiado polo GALP Ría de Arousa a través da Consellería do Mar e o Fondo Europeo Marítimo de Pesca e Acuicultura (FEMPA).
