O equipo de Goberno local de Ribeira mantivo este martes 14 de novembro unha reunión coa veciñanza na Casa da Cultura de Carreira na que foron abordados distintos temas que afectan e preocupan aos residentes da parroquia.
Durante o encontro abordáronse cuestións relativas ás infraestruturas e servizos públicos e tamén asuntos sociais e culturais que teñen pegada na calidade de vida das persoas residentes en Carreira. A reunión foi tamén unha oportunidade para debater coa veciñanza sobre proxectos como o centro de acollida proxectado para Carreira ou os traballos previstos para suavizar a curva da Muiñeira.
Os integrantes do Goberno municipal recoñeceron que están a realizar reunións coa veciñanza de distintos barrios e parroquias
co propósito de mellorar a xestión local e incrementar participación cidadá. “Os encontros que estamos a realizar nas parroquias son fundamentais para promover a transparencia gobernamental e abordar de xeito efectivo as necesidades específicas de cada comunidade”, explicou o alcalde Luís Pérez.
Estes encontros, engadiu, representan unha plataforma para fomentar o diálogo aberto e construtivo entre o Goberno local e os cidadáns, co propósito de “crear políticas máis inclusivas”. Desta maneira, veciñanza de Carreira tivo a oportunidade de expresar as súas inquietudes, suxestións e propostas. Os representantes do Goberno tomaron nota das inquietudes expostas e comprometéronse a traballar en conxunto coa comunidade para buscar solucións efectivas.
