Ademais amplíanse as zonas de estudo de catro a sete, que inclúe Aguiño.
A Xunta de Galicia e a Universidade de Vigo seguirán co seu estudo de identificación e marcado selectivo de larvas de mexillón tras a renovación do acordo de colaboración. Este estudo ten como obxectivo obter información sobre a evolución do recrutamento de semente de mexillón en Galicia, e está financiado polo Fondo Europeo Marítimo, de Pesca e Acuicultura (FEMPA).
No novo acordo amplíanse os puntos de control de catro a sete, polo que se incluirá Liméns, Aguiño e Lorbé.
Para este novo período de 2024 a 2026, a Consellería do Mar da Xunta de Galicia achegará 217.000 euros. A Universidade de Vigo encargarase da identificación e cuantificación larvaria, mentres que, o Centro de Investigacións Mariñas (CIMA) de Vilanova de Arousa coordinará e analizará os resultados.
Desde a Consellería están a considerarse outras medidas para mellorar a xestión da semente de mexillón no medio natural para o seu posterior cultivo, como unha nova normativa de consenso e a exploración de alternativas que permitan obter maior cantidade de semente, incluída tecnoloxía de drons e a aplicación de intelixencia artificial para detectar o recurso en zonas de difícil acceso.
