A Comunidade de Montes de Baroña celebra o 15 de outubro as VII Xornadas Micolóxicas, en colaboración con MycoGalicia Plantae. O obxectivo será reivindicar os cogomelos con presenza nos nosos montes, valorizalos e aprender á poboación a distinguilos (poñendo o foco naquelas especies onde poida haber confusión). Haberá contidos teóricos, prácticos e degustación. Desenvolverase na contorna do local da Comunidade de Montes, a partir das 10h. Máis información en 679 156 855.
O programa comezará a partir das 10.00 horas, cunha charla explicativa no dito local da Comunidade sobre os aspectos máis destacados da micoloxía (tipos de fungos, métodos de selección e identificación, características, etc).
Ás 11.00 haberá unha saída ao couto micolóxico de Baroña para recoller cogomelos, con asesoramento profesional durante todo o percorrido.
Ás 13.30 horas está prevista unha xuntanza na Casa Forestal para a selección e posterior preparación dos exemplares recollidos, elaborados de formas diversas.
Ás 14.00 horas degustaranse os pratos realizados.
Recoméndase levar calzado cómodo e roupa axeitada para o monte (ollo coa chuvia), e tamén unha cesta de vimbio ou semellante para a recollida de exemplares.
Organiza a Comunidade de Montes de Baroña.
