Este venres cúmprense 150 anos da posta en marcha da primeira liña ferroviaria de Galicia, que conectaba as estacións de Cornes en Conxo e Carril en Vilagarcía. Con motivo da data, os Concellos de Vilagarcía e Santiago organizan conxuntamente unha serie de actos conmemorativos do fito.
Unha exposición itinerante, conferencias e a reinauguración do Museo do Ferrocarril de Vilagarcía (Mufevi) son os actos que se celebrarán nas próximas semanas e que contarán con representación institucional de ambas as cidades.
A chegada do tren influíu na conexión do tráfico de mercadorías por terra e por mar. Comisariada por Carlos Abellán, expresidente da Fundación dos Ferrocarrís Españois, exdirector do Museo do Ferrocarril de Madrid e actual presidente da Asociación Compostelá Amigos do Ferrocarril, a exposición chegará a Carril o 18 de outubro. O mesmo día tamén se realizará unha conferencia sobre o tema.
