Este xoves 10 de agosto, ás 20.30 horas, o paseo marítimo de Barraña vai acoller un espectáculo de SU.MA para público familiar e infantil. Trátase de Glamping, unha proposta de teatro-clown e musical que nos pon na pel de tres amigos con caracteres moi dispares que se embarcan na aventura de pasar unhas vacacións xuntos. Porén, a convivencia non sempre é cousa fácil e os conflitos toman parte na escena cotiá dos campistas.
“Glamping“, explican as súas creadoras, “é un espectáculo sobre as relacións humanas, onde calquera poderíamos ser ese personaxe en tensión, buscando a mellor maneira de resolver a situación”. Os ingredientes básicos son teatro xestual, música, acrobacia aérea, danza e swing en clave de clown.
SU.MA é o acrónimo de Sue Moreno e María Move.
