A contadora, actriz e escritora Paula Carballeira vai estar este martes 22 de agosto en Cespón (San Roque) para achegar un espectáculo de narración oral para a rapazada de Boiro e da contorna. Trátase da peza Camiños de mar, terra e vento, un espectáculo dirixido ao público familiar e infantil que propón unha viaxe acugulada de máxicas andanzas polos camiños da terra (por onde vai quen quere, lonxe e amodiño, atopando aventuras e novos amigos) polos camiños do aire (por onde vai quen adiviñou como voar, sexa coa axuda de paxaros, alfombras, vasoiras ou voadas de aire) e polos camiños da auga (por onde vai quen agarda atopar illas misteriosas, sereas e a música das olas). Comezará ás 20.30 horas. Organizan o Concello de Boiro e a Deputación da Coruña.
