Este xoves 13 de xullo a veciñanza de Corrubedo vai seguir adiante coas súas periódicas mobilizacións para asegurar un servizo médico permanente e de calidade no Centro de Saúde da vila. Desta volta a concentración terá a particularidade de que se levará a cabo en Santiago, e non nas rúas de Corrubedo. Segundo comunicaron os veciños, fretaranse 2 autobuses para manifestarse ante o Parlamento polos recortes do servizo médico no consultorio de Corrubedo. Segundo lembran, a día de hoxe tan só acode un médico 2 días á semana.
“Levamos 8 meses de concentración no noso pobo, pero dende o Goberno autonómico e a Xerencia da Área Sanitaria de Santiago non nos fan nin caso, polo que temos que facernos notar máis preto dos gobernadores”, sinalan, lembrando que a concentración será arredor das 11 horas deste xoves 13.
