O Concello de Ribeira informou da licitación dunha nova actuación dirixida á mellora da accesibilidade en beirarrúas e saneamento en Gándara, na parroquia de Oleiros.
Cun orzamento de 100.968,23 euros e un prazo de execución de catro meses, o obxectivo é “mellorar a accesibilidade no lugar da Gándara renovando as beirarrúas existentes para facilitar o tránsito peonil, ao tempo que dotar dunha rede de saneamento nunha zona deste lugar que carece dela”.
A tal efecto, reordenarase a zona de paso utilizando un pavimento continuo de formigón desactivado. Nos accesos aos pasos de peóns e nas subidas/baixadas ás beirarrúas colocarase baldosa hidráulica.
En canto á nova liña de saneamento, disporase un colector polo centro do camiño de PVC liso e 250 milímetros de diámetro.
O investimento foi incluído no Plan Provincial de Cooperación ás Obras e Servizos de Competencia Municipal (Plan Único de Concellos) POS+ 2022, aprobado pola Deputación Provincial da Coruña. As empresas interesadas dispoñen ata o 17 de xullo á medianoite para presentar as súas ofertas a través do Sistema de Licitación Electrónica da Xunta de Galicia (SILEX).
