O Concello de Ribeira vén de sacar a licitación unha nova actuación consistente na renovación de servizos e o pavimentado da rúa da Cambra, na parroquia de Palmeira. O orzamento será de 82.069,87 euros e o prazo de execución de tres meses.
Segundo informa o Concello, a rúa en cuestión conta na actualidade cun pavimento de formigón “bastante deteriorado” e, ademais, os servizos urbanos de auga para consumo, saneamento e pluviais son moi antigos.
O proxecto elaborado prevé “mellorar as condicións de accesibilidade e funcionalidade da rúa creando unha plataforma única na que vehículos e peóns circulen na mesma cota, dando prioridade ao tránsito peonil”. Con tal motivo substituirase o firme actual por un novo pavimento de formigón no que se intercalarán franxas transversais de lousas de granito.
Tamén serán renovados, mellorados e modernizados os servizos de saneamento, pluviais e abastecemento de auga potable.
As empresas interesadas dispoñen ata o 29 de xuño para presentar as súas ofertas a través do Sistema de Licitación Electrónica da Xunta de Galicia (SILEX).
O investimento foi incluído no Provincial de Cooperación ás Obras e Servizos de Competencia Municipal (Plan Único de Concellos) POS+ 2022.