A Asociación de Empresarios de Ribeira abriu este venres as portas dun dos grandes eventos do calendario anual da patronal ribeirense, que se celebra os días 16, 17 e 18 de xuño. Estamos a falar da cuarta edición da Feira do Automóbil Híbrido e Eléctrico, unha ocasión inmellorábel, na comarca do Barbanza e na xeografía galega, para coñecer de primeira man os novos lanzamentos do ámbito do motor en materia de mobilidade sustentábel, eficiente e respectuosa co medio ambiente. O evento desenvólvese novamente na praza de España de Ribeira, con entrada de balde en horario de 10:00h a 20:00h.
Nela estarán presentes ata 13 marcas de vehículos mostrando ao público asistente un total de máis de 120 modelos. Segundo informou a patronal, “no salón atoparemos as últimas novidades nesta tecnoloxía innovadora dos vehículos híbridos e eléctricos e que xa é unha realidade no noso día a día”.
Os concesionarios terán ocasión de presentar en exclusiva para a comarca do Barbanza as últimas novidades no sector.
A previsión da patronal é conseguir que esta edición “sexa un éxito como as edicións anteriores”, onde pasaron polo evento máis de 4.000 persoas.
