O Concello de Ribeira informou da adxudicación do proxecto para crear unha senda peonil en Coroso: unha intervención que se enmarca na estratexia de desenvolvemento urbano Máis Ribeira Atlántica, que está co-financiada nun 80% polo Fondo Europeo de Desenvolvemento Rexional (FEDER) dentro do Programa Operativo Plurirrexional de España (POPE) 2014-2020.
A empresa adxudicataria entre as cinco empresas presentadas, resultou Zona de Obra O Rosal, S.L., conforme a unha proposta de 151.233,69 euros, IVE incluído. O prazo de execución son catro meses.
Segundo explican dende o Concello a respecto dos porqués deste proxecto, actualmente a contorna do río Grande está moi degradada, sendo imposíbel circular pola súa zona de servidume. Co obxecto de recuperar este espazo para uso público proponse a creación dunha senda peonil que permita acceder a pé até a praia de Coroso desde a estrada AC-305. Con tal fin redactouse un proxecto co obxecto de crear unha senda peonil de 297 metros de longo e tres metros de ancho dende o arroio Saíñas ata o Paseo Marítimo de Coroso.
Deste xeito conéctase a AC-305 ou avenida da Coruña coa praia de Coroso, dunha maneira sustentábel, integrada e innovadora, enlazando unha zona de gran actividade comercial (especialmente polos supermercados alí situados) con outra zona escolar na que se atopan o CIFP Coroso e a Escola Oficial Náutico Pesqueira.
Na maior parte do trazado (278 metros) utilizarase pavimento natural estabilizado flanqueado por bordos de madeira, a excepción dun tramo de pasarela de madeira con pilotes de 19 metros de longo.
Con esta intervención preténdese “transformar a fronte fluvial nunha zona con maior calidade ambiental, paisaxística e de seguridade, xerando un espazo mixto, con predominio para o peón pero no que tamén poderían circular bicicletas (non así vehículos a motor), potenciando así a mobilidade alternativa e dándolle plusvalía aos espazos verdes, para o uso cotiá e o lecer”.
