Hai un ano inaugurábanse os Premios We Sea, uns galardóns que nacían con vontade de premiar os traballos fin de grao e fin de mestrado realizados polo alumnado da Universidade de Vigo que se distinguiran por ser relevantes en temáticas relacionadas coa sustentabilidade e a economía circular. Con esta finalidade a institución académica viguesa e a empresa de Boiro JEALSA, referente galego e internacional na fabricación e distribución de conservas de peixe e marisco reuníanse este luns 8 de maio mediante a representación do reitor da Universidade de Vigo, Manuel Reigosa, e a responsábel de Relacións Institucionais da empresa, Margarita Hermo. Neste encontro tamén estiveron as dúas estudantes premiadas na primeira edición, Ana Isabel Baanate e Raquel Barciela, xunto á vicerreitora de Estudantado e Empregabilidade, Natalia Caparrini.
En canto aos premios, dicir que ao igual ca na anterior edición, consistirán nunha axuda en metálico de 1000 euros e na realización de prácticas remuneradas -650 euros brutos mensuais- por un período de tres meses nalgún dos centros de traballo na sociedade de Conservas Rianxeira -JEALSA- na comarca do Barbanza. Tal e como se explicou tras a xuntanza, os premios van dirixidos ao alumnado con TFG e TFM defendidos no curso 2022/2023 cunha cualificación igual ou superior a oito puntos e cuxas temáticas estean relacionadas coa sustentabilidade e orientados á consecución dalgunha das metas incluídas no ODS 14 -Vida submarina, conservar e empregar de maneira sostíbel os océanos, mares e recursos mariños-; e economía circular, en concreto, o ODS 12 (Produción e consumo responsábel: garantir modalidades de consumo e produción sustentábeis).
“Nuns días convocarase a segunda edición dos Premios We Sea e a idea é manter o prazo de presentación aberto até mediados de setembro para que poidan presentarse todos os alumnos e alumnas que defendan os seus traballos durante xuño e xullo”, explicou a vicerreitora Natalia Caparrini, quen xunto ao reitor e á responsábel da empresa, insistiron na idea de que “é unha iniciativa de continuidade que se prolongará de maneira automática ano tras ano”.
