Os socialistas de Boiro presentaron unha moción para o seu debate no pleno ordinario da Corporación local deste vindeiro xoves 16 de maio na que demandan á Xunta de Galicia “aumentar o financiamento económico do Servizo de Axuda no Fogar, así como mellorar os servizos para reducir as listas de agarda en valoracións”.
O grupo explica que “o Servizo de Axuda no Fogar (SAF) estase a converter nunha pesada carga para os Concellos pois a Xunta limítase a anunciar autorizacións no número de horas que pode prestar cada Concello pero son as administracións locais as que seguen a asumir o custe do servizo”. Ademais, indican, “a Xunta mantén conxelados os prezos de módulo/hora e son os Concellos os que licitan e adxudican un servizo que se encarece ano tras ano”.
A agrupación sinala tamén que nos últimos anos o custe do servizo incrementouse de xeito significativo “sen que o Goberno autonómico do Partido Popular fixese algunha achega para cumprir coas súas obrigas de financiamento do servizo e paliar estes elevados custes que os Concellos se ven na obriga de soportar cando non teñen nin as competencias nin a obriga de prestar o servizo”.
Lembran ademais que o custe dunha hora do servizo de axuda no fogar está entre os 22 e 24 euros, dos que a Xunta, contando coas achegas autonómicas que lle fai o Estado, achega 12 euros, sendo os Concellos e as persoas usuarias as que asumen o restante cos seus propios fondos. “Isto súmase a que o SAF é un servizo cada vez máis demandado debido ao envellecemento da poboación, supoñendo xa para moitos Concellos un gasto superior ao da limpeza viaria ou recollida de lixo”, sinalan na moción, reclamando á Xunta que “asuma o custe derivado da redución do copago, aumentar o financiamento ao SAF, dote dos medios e recursos necesarios para reducir as listas de agarda en valoración de dependencia e exerza como mediadora nas negociacións para tratar de alcanzar un acordo de convenio colectivo co sector”.
