O deputado Antón Gómez Reino, do Grupo Confederal Unidas Podemos-En Comú Podem-Galicia En Común, presentou unha iniciativa no Congreso na que insta ao Goberno a implementar medidas para evitar o vertido de augas da mina de San Finx á ría de Muros e Noia autorizado pola Xunta de Galicia.
En concreto, o portavoz de Galicia en Común no Congreso recolle unha demanda de Marea Cidadá de Noia e pregúntalle ao Ministerio para a Transición Ecolóxica e Reto Demográfico “se valora iniciar procedementos para forzar á Xunta de Galicia a cumplir coas súas obrigas”.
Gómez Reino refírese á incorporación das presas de augas residuais da mina de San Finx ao inventario de instalacións de residuos mineiros clausuradas que, en palabras da Marea, “teñen un impacto medioambiental grave, como así o establece a normativa”.
“Dáse o caso de que, pese á falta de actividade e ao abandono destas instalación durante anos, e a pesar da constatación de que estas balsas contén augas e lodos contaminados por metais pesados, por parte da Xunta de Galicia non se realizou a obrigada comunicación para incluír estas presas no citado inventario, chegándose a ocultar a súa existencia en determinados procedementos administrativos realizados até o momento, ou ben inclusive negando a natureza destas balsas de residuos e conferíndolles outros usos, afirmacións que se demostraron falsas”, expón o deputado na iniciativa.
Gómez Reino recolle as denuncias e mobilizacións por parte de colectivos e organizacións, entre as que destacan as do sector pesqueiro e marisqueiro e o ambientalista, contra a autorización dos vertidos, que, segundo apuntan, “poderían afectar aos ecosistemas fluviais e á propia ría de Muros e Noia, riscos que confirman diversos estudos que poñen o foco nas elevadas concentración de metais pesados dos vertidos”.
Nese senso, o deputado tamén pregunta polas medidas emprendidas ou que vai emprender dito Ministerio, no marco das súas competencias, para evitar os vertidos que suporían graves afectacións de tipo ambiental, socieconómico e de saúde pública.
