A Agrupación de Alfombristas Florais de Porto do Son informou que nestes momentos xa están collendo corpo os preparativos para a realización das alfombras florais de Corpus Christi en Porto do Son, polo que unha vez máis “serán benvidas as persoas voluntarias que desexen colaborar neste nobre labor que dá continuidade á tradición do noso concello”, explican, engadindo que as tarefas a desenvolver son moitas e variadas (por exemplo cortar verde), polo “que imos precisar de todas e todos vós para botarnos unha man”. Igualmente, sinalan tamén que se pode colaborar facendo doazóns de verde e de flores. Os traballos estanse a centralizar na antiga Casa das Monxas, no paseo do porto, e a partir deste mes de xuño tamén se fará uso da Casa da Cultura, en horario de 16.00 a 20.00 horas.
As persoas que queiran unirse ao equipo poden poñerse en contacto ca Área de Cultura do Concello de Porto Son no 981 767 758 e comunicalo. Tamén poden chamar ao 646598499 ou ao 659748938.
