Este xoves 11 de maio o local da Asociación de Empresarios de Ribeira acolleu pola mañá a entrega de premios da Campaña do Día da Nai, celebrada os días pasados. Contouse coa presenza do presidente da patronal, Francisco Martínez Gude, e do concelleiro de Promoción Económica, Ramón Doval. No acto entregouse o galardón de 1.000 euros en compras a Mariola Mandrágora (co asesoramento dunha personal shopper). As persoas agraciadas cunha cesta de compra de 50 euros foron Carolina (Regalos O Capricho), Ángeles (Oasis Cafetería), Fernanda Cores (Gena’s) e Mariana (Ribalá).
A campaña activouse o 25 de abril. Incluíu un sorteo dirixido a tódolos clientes que mercasen ou consumisen durante eses días (até o 7 de maio) nos establecementos asociados participantes. O obxectivo fundamental foi incrementar as vendas e incentivar o consumo no pequeno comercio retallista e hostalería de Ribeira, segundo explicou a patronal.
O premio grande desta campaña foi un vale de compra por importe de 1.000€ e o asesoramento dunha personal shopper que acompañará á persoa premiada no momento de realizar as compras do premio. Este ten que ser gastado un día en concreto a determinar entre a asociación e a/o premiada/o nos establecementos participantes nesta campaña, como data máxima o 31 de maio de 2023. O importe deste premio deberá ser gastado nos tres sectores que participan nesta campaña: comercio, hostalería e restauración.
Os outros premios da campaña foron 20 entradas para unha sesión de masterclass de estilismo e cestas da compra valoradas en 50€ cada unha.
