Antón Luaces.- Cando aínda non desapareceran totalmente dos corpos dos bateeiros as marcas das defensas dos policías antidisturbios que cargaron contra deles vai unha semana en Santiago de Compostela, durante unha concentración en protesta pola indefinición na que se atopa o labor de extracción da mexilla para trasplantala ás cordas de engorde das bateas, dous barcos -un con base en Cee e o outro en Fisterra- descargaron na rambla de Espiñeiro (perto da vila fisterrá) un total de 800 quilos de mexilla cuxa procedencia non se fixera pública á hora na que redacto esta crónica.
A Garda Civil e máis o Servizo de Gardacostas de Galicia, nunha intervención conxunta motivada por esta acción irregular dos barcos (non ter vendida e comercializada en lonxa a mexilla que transportaba un vehículo ao que esta fora trasladada desde as embarcacións) localizaron eses 800 quilogramos de mexilla no interior do vehículo intervido, distribuida en 40 sacos, que fora descargada dos pesqueiros na devandita rambla de Espiñeiro. Unha vez efectuado o desembarque de mexilla, os barcos puxeron rumbo a Fisterra e o vehículo tomou dirección a Corcubión.
O Servizo Marítimo da Garda Civil (SEMAR) levantou acta da carga transportada no coche por suposta infración á Lei 11/2008 de Pesca de Galicia por trasladar produtos da pesca carecendo da documentación regulamentaria e polos ter adquirido fora das canles legais de comercialización (a mexilla non dispuña da documentación esixida pola citada lei, que estipula asimesmo a obriga de levar a guía de circulación en calquera tipo de desprazamento).
As investigacións policiais deberán agora determinar a procedencia da mexilla e o seu destino, o que pode abrir novas vías que permitan saber ata que punto este tipo de actuacións poden incidir no enfrontamento entre bateeiros e percebeiros e mesmo quen está detrás ou se beneficia do labor realizado -posiblemente non por primeira vez- polos armadores dos barcos e as tripulacións destes.
