Ás 12,00 horas deste luns, 3 de abril, o ministro do Interior Fernando Grande-Marlaska Gómez, acompañado do ministro de Agricultura, Pesca e Alimentación, Luis Planas Puchades, asistirá nos Estaleiros Armón, de Vigo, ao acto de presentación e botadura da nova patrulleira da Garda Civil do Mar “Río Luna”.
Este nome dun río leonés designará á máis nova patrulleira oceánica que substituirá no seu momento á veterana “Río Miño”, construída en 1984 e reformada en 2017 no estaleiro que Armón ten en Burela.
O valor da “Río Luna” é de case que 35 millóns de euros. Este buque ten unha eslora de 85 metros e prestará servizo na comandancia de Pontevedra. Pertence á clase Guardamar e ven ser, sobre todo, unha nave de busca e rescate, plataforma intermedia entre os remolcadores e as embarcacións rápidas, aínda que con maior capacidade de rescate e remolque e unha maior autonomía. Poderá actuar a certa distancia da costa, mesmo en misións que se prolonguen durante varios días. Ten capacidade para dar acubillo ata a 30 náufragos.
O Servizo Marítimo da Garda Civil vai utilizar esta embarcación para a patrullaxe marítima, a represión do contrabando e o control da inmigración ilegal. Tamén poderá ser empregada en misións de salvamento, loita contra a contaminación ou tarefas de axuda humanitaria, xa que logo dispón dunha plataforma polivalente de 20 metros de eslora para localizar provisoriamente a náufragos.
A “Río Luna” dispón dun sistema de propulsión eléctrico que permite un aforro de combustible do 60%.
O Servizo Marítimo da Garda Civil (SEMAR) é a unidade responsable da vixilancia das augas territoriais españolas. Desde a súa creación en 1991, a súa actividade significouse especialmente na utilización de equipos avanzados para manter a alta velocidade e a manobrabilidade das súas embarcacións.
A “Río Luna”, xunto á “Río Sil” (que entrou en servizo en 2022) únese a un grupo de patrulleiras de intervención rápida que prestan asistencia tanto ao propio SEMAR como á Sociedade de Salvamento e Seguridade Marítima, SASEMAR.
