A Área de Igualdade da Deputación da Coruña que xestiona a deputada María Muíño convocou o I Concurso de microvídeos De fronte á violencia de xénero, que nace co obxectivo de seguir avanzando, mobilizando a creatividade e a implicación da xuventude, cara a igualdade real de oportunidades entre mulleres e homes e a prol da erradicación das agresións. Porase o foco, a través do formato e das canles de difusión elixidas, en loitar contra a violencia de xénero dixital.
A participación está aberta a mozos e mozas de entre 12 e 18 anos que se presenten individualmente ou en grupo, contando co apoio e a orientación doutras persoas, das familias, contorna ou persoal docente do centro de estudos ao que se adscriben.
Os e as participantes deberán achegar un único microvídeo orixinal e inédito, non premiado con anterioridade nin difundido publicamente por ningún tipo de soporte nin canle, cunha duración mínima de 30 segundos e máxima de 90, en galego e atendendo á perspectiva de xénero.
O obxecto do certame é elaborar contidos a través dos cales se impulse a reflexión, conciencia, sensibilización, identificación e prevención das violencias de xénero dixital, entendidas estas como todas as condutas de violencia de xénero que se exercen a través das novas tecnoloxías, redes sociais ou en Internet. Preténdese tamén que a poboación adolescente cree debate, reflexión, mobilización e cambio social sobre o ciberacoso, o sexting, a sextorsión, o stlaked, o grooming, o shaming, o doxing ou calquera outra forma de acoso nas redes.
A convocatoria tramitarase de xeito telemático, a través da plataforma de tramitación electrónica da Deputación (SUBTEL).
