A Confraría de Pescadores de Noia e a Plataforma en Defensa da Ría de Arousa (PDRA) veñen de dirixir un escrito conxunto ao Comité de Cumprimento da Convención de Aarhus de cara á vista que este órgano da ONU celebrará en Xenebra (Suíza) o próximo 22 de marzo para avaliar os incumprimentos da Xunta nas minas de San Finx e Varilongo, ámbalas dúas propiedade da empresa australiana Pivotal Metals.
As dúas organizacións lembran no comunicado que o feito de “que o proxecto mineiro non se sometera á avaliación de impacto ambiental, impedindo deste xeito a participación pública, supuxo unha violación da Convención de Aarhus, asinada por España en 1998 e que consagra os dereitos de participación pública e acceso á información e á xustiza en materia de medio ambiente”. Achegaron tamén o informe do hidrólogo Steven Emerman, no que se di que a autorización de vertidos que vén de outorgar a Xunta á mina “carece de rigor e pon en risco á ría”.
Por outra parte, rexeitaron a pretensión da Xunta de Galicia de pospoñer a sesión na que o Comité da ONU analizará o caso ata o mes de xuño, tendo alegado a través da Subdirección Xeral de Relacións Internacionais do Ministerio para a Transición Ecolóxica que “non teñen tempo suficiente para preparar a sesión prevista para o próximo 22 de marzo”. As dúas entidades critican esta petición porque “o caso leva aberto dende 2017 e que tanto os comunicantes como a propia Xunta xa remitiron os seus escritos de conclusións en 2019”. Para a confraría, este requirimento da Xunta iría destinado a “impedir que a ONU poida emitir agora un ditame sobre os incumprimentos en San Finx”, unha manobra, sosteñen fontes do pósito noiés, que “ten o obxectivo de gañar tempo e privar ás entidades que mostraron a súa oposición á autorización de vertidos da posibilidade de incorporar o pronunciamento da ONU ás demandas xudiciais que se irán iniciar a raíz dese permiso”.
A confraría e a PDRA agardan que a ONU emita un ditame onde “quede patente que foi vulnerada a Convención de Aarhus” e “se obrigue ao Estado a someter á mina de San Finx a unha avaliación de impacto ambiental no que se consideren todos os seus potenciais impactos, incluíndo á ría de Muros e Noia e os seus bancos de marisqueo”.
