A Deputación da Coruña, con motivo do 8-M, lanzou unha campaña para denunciar a precarización do traballo reprodutivo (o conxunto de traballos que sosteñen a vida diaria da sociedade: o traballo doméstico, mais tamén os servizos públicos de saúde, de educación, da dependencia, do socio-comunitario, da igualdade ou do acceso á vivenda). Trátase da iniciativa É por ser muller, que pon o foco nas actividades laborais precarizadas ou non remuneradas e que constitúen unha das grandes fendas de desigualdade por causa de xénero, segundo sinala a entidade provincial.
Seguir denunciando, máis tamén reflexionando e creando espazos de debate e diálogo ao redor desta cuestión, é o obxectivo da campaña que pon en marcha neste 8-M a área de Igualdade da Deputación da Coruña, que xestiona a deputada María Muíño. Trátase dunha programación que botará a andar o propio mércores 8 de marzo, Día da Muller, no vestíbulo do edificio da Deputación na Coruña, nun acto institucional no que participarán membros da corporación provincial e cunha actuación do grupo musical Fillas de Casandra cos seus temas reivindicativos.
A axenda do 8M da Deputación, como xa vén sen tradición nos últimos anos, abranguerá os meses de marzo e abril, e ao largo do territorio. Así, continuará con palestras, mesas de diálogo e espectáculos musicais na Coruña, Cambre, Betanzos, Ordes, Arzúa, Oroso, Carballo, Cabanas e Zas.
Venres 10 na AC Alexandre Bóveda
A primeira da citas desta programación expandida terá lugar na tarde do venres 10 de marzo, das 16h ata as 19:30h, nas instalacións da AC Alexandre Bóveda.
A primeira das actividades leva por título Voces sobre o marco estrutural do mundo do traballo desde unha perspectiva feminista, e nela participarán Laura Bugalho, especialista en intervención socioeducativa, sindicalista e activista trans feminista; Antía Pérez Caramés, profesora doutora en socioloxía na UDC, e estará moderada por Ana Lorenzo, socióloga e vinculada á economía social e alternativa desde a década de 1990.
Continuará cunha Conversa para dar voz á situación dos dereitos laborais en sectores feminizados, encabezada por Marisol Gómez do SAF de Vilagarcía e por Ángeles Mille, secretaria da Asociación de Redeiras Profesionais O Fieital de Malpica representando a ANMUPESCA. Como moderadora intervirá Mariola Mourelo.
E rematará co espectáculo O benquererse, a cargo de AldaoLado, no que Lucía Aldao e María Lado abordan os temas dos coidados e a precariedade a través das súas propias vivencias persoais. Achegarán unha mestura de poemas, música e historias para facer visíbeis as desigualdades que as mulleres atopan na vida pública e privada.
