A Consellería de Infraestruturas e Mobilidade adxudicou por 70.545.891 euros a execución das obras de ampliación do Hospital Clínico Universitario de Santiago, que blindará a sanidade pública de 450.000 cidadáns.
As actuacións, adxudicadas á UTE Dragados S.A., Constructora San José S.A. e Construcciones Ramírez S.L., prevé iniciarse na primeira quincena de maio. Os traballos, contan cun prazo de execución de 42 meses e levarán aparellados 1.400 empregos.
As obras adxudicadas permitirán á Xunta ampliar a superficie do actual hospital en case un 30%, de modo que se poida mellorar a atención aos pacientes.
Para iso, a través deste contrato, procederase á ampliación do edificio A -no que se atopa a área de hospitalización, os servizos centrais e as emerxencias-, na parte sur do edificio existente cara ao oeste; de forma mimética ao actual edificio hospitalario, para acadar maior integración arquitectónica e funcional, dispoñendo un núcleo de comunicación vertical con 8 ascensores.
Tamén se ampliará a superficie, no caso do edificio A, en preto de 29.000 metros cadrados, acometendo a demolición de 2.000 metros para axustar e encaixar as novas instalacións.
No edificio C -que alberga as consultas externas e as probas funcionais-, a intervención permitirá habilitar case 5.300 metros cadrados de nova superficie.
Neste caso a ampliación executarase cara ao leste, con 5 plantas coincidentes coas actuais, comunicándose cos eixes de circulación xeral do edificio e cun núcleo de comunicacións situado en paralelo ás zonas de espera da fachada sur.
Novas unidades de hospitalización
A ampliación do CHUS fará posible contar con 5 novas unidades de hospitalización con 36 camas cada unha e unha nova unidade de hematoloxía de 28 camas, sumando 208 camas máis dispoñibles e permitindo que todas as habitacións sexan dobres ou individuais.
O aumento de superficie do complexo permitirá, ademais, ampliar as urxencias pediátricas e reformar as de adultos, incorporar 7 novos quirófanos e terá incidencia directa noutras áreas como o laboratorio de microbioloxía, o hospital de día, a unidade de mama, área de endoscopias e consultas externas.
Esta actuación é a culminación da aposta que a Xunta está a facer para a mellora e modernización do Complexo Hospitalario e Universitario de Santiago, que se vén concretando, entre obras e equipamento, nun investimento de máis de 110 M€ só para este complexo desde o 2009 ata 2025.
