Este mércores 15 de febreiro celebrouse en Porto do Son a cuarta xuntanza da Mesa Local de Coordinación Interinstitucional Contra a Violencia de Xénero. Na reunión, presidíndoa, participaron o alcalde, Luis Oujo, a concelleira de Benestar Social, Magdalena Pérez, e a psicóloga de servizos sociais, Cristina Fontaíña.
Tamén estiveron presentes e achegaron as súas propostas e análises María Tembra e Isabel Santos, traballadoras sociais dos Servizos Sociais comunitarios do Concello de Porto do Son; Sergio Seoane, traballador social do Centro de Saúde de Porto do Son; María Dolores Crujeiras, avogada do CIM de Ribeira; Sergio Paz, sarxento da Garda Civil de Porto do Son; Cristina, cabo do Equipo Vioxén da Garda Civil de Noia; María Quintaro, traballadora social do Hospital do Barbanza; Elena González e Loli Fernández, a orientadora e a xefa de estudios do IES de Porto do Son; e Julia Veiro e Isabel Castiñeiras, psicóloga e avogada do CIM de Noia.
As mesas locais nacen co obxectivo de canalizar os esforzos e recursos das diferentes institucións de cara á prevención e loita contra a violencia machista. Segundo salientou o Concello de Porto do Son, “a súa natureza insterinstitucional facilita o desenvolvemento de dinámicas cooperativas e o establecemento de redes de colaboración entre as diferentes institucións e colectivos sociais que interveñen no territorio”.
