Bernardo Paz, ilustrador de Ribeira, plasma o Folión de Manzaneda nas caixas de leite de Feiraco

A empresa galega láctea Feiraco, integrada na Cooperativa Rural Galega CLUN e con sede no
concello coruñés de Ames, acaba de poñer en marcha unha iniciativa vencellada ao Entroido. Como xa vén sendo costume, a firma quere homenaxear un ano máis aos diferentes Entroidos que se celebran na nosa comunidade.
Co lema “Entroidos tan galegos coma nós”, as caixas de leite da empresa levan nestas datas unha imaxe moi particular, a de Entroidos singulares da nosa xeografía: o Folión de Manzaneda, os Xenerais do Ulla e o Entroido de Cobres. “Son tantos os `Entroidos´ que existen na nosa terra que quixemos facer unha representación de tres deles a través da visión de ilustradoras e ilustradores emerxentes galegos” -sinalan-. Feiraco segue así fiel ao seu compromiso coa cultura de Galicia, contribuíndo á súa difusión, e nesta ocasión apoiando ademais a artistas novos da comunidade, convertendo en lenzos as caixas de leite.
O Folión de Manzaneda
As caixas de leite enteiro están dedicadas ao Foilón tradicional do Entroido de Manzaneda (Ourense). O son do folión, cos bombos, tambores, chocas e utensilios de labranza metálicos, enche todos os recunchos da localidade ourensá durante este peculiar pasarrúas, coa Mázcara como personaxe principal. Levan os seus característicos gorros con cintas de cores, destacando os seus saltos e danzas de orixe arcaico.
O ilustrador e deseñador gráfico Bernardo Paz (Ribeira, 1984) realizou unha proposta que transmite moito ritmo e musicalidade. “Esta experiencia permitiume afondar no folclore galego, nas tradicións que descoñecemos e neste Entroido en particular, do que me chamou a atención que é unha actividade social que reúne a todo o pobo, todo o mundo sae á rúa a agardar pola máscara, todos interactúan. Tratei de recoller esta idea do pobo en alerta, o estrondo dos tambores e das trompetas. Foi un proceso moi gratificante e unha magnífica plataforma para dar a coñecer o noso traballo a un público moi diverso” -remarca-.

Os Xenerais do Ulla
As caixas de leite semidesnatado están dedicadas ao Entroido dos Xenerais do Ulla, Festa Declarada de Interese Turístico de Galicia. Celébrase en diferentes parroquias dos concellos de Boqueixón, A Estrada, Santiago de Compostela, Silleda, Teo Touro, Vedra e Vila de Cruces. A súa orixe está nos enfrontamentos armados que tiveron lugar na comarca ao longo do século XIX. A vestimenta dos Xenerais evoca aos uniformes militares decimonónicos. Na cabeza levan un chamativo bicornio rematado en plumas. Montan
cabalos nos que destaca un espello adornando a súa cabeza. Por parellas, realizan atranques, enfrontamentos dialécticos nos que se mofan de asuntos sociais de actualidade.
A ilustradora Sarai Lorenzo (Cangas, 1995), inspirada pola natureza e os contos populares, retratou desde o seu punto de vista este singular Entroido. Os Xenerais, as plumas e os cabalos son os elementos principais da súa ilustración, empregando a técnica da estampación pero en dixital. “Para min foi unha gran sorpresa que me seleccionaran para este proxecto, sobre todo tendo en conta que se trata dunha empresa grande e ademais galega, unha moi boa oportunidade. Estou empezando e fíxome moita ilusión que se fixaran en min, que nos dean este protagonismo aos ilustradores” -manifesta-.
O Entroido de Cobres
Nas caixas de leite desnatado está representado o Entroido de Cobres, que se celebra no concello pontevedrés de Vilaboa e está recoñecido como de Interese Turístico. As súas orixes remóntanse ao século XVII. Os seus personaxes principais son as Madamas e os Galáns, vestidos con coloridos traxes, cargados de xoias, cintas e abelorios, portando vistosos sombreiros.
Irene San Juan (A Coruña, 1981), dedicada á ilustración infantil e xuvenil, realiza as súas obras sobre un estilo naíf. Explica que lle gusta debuxar personaxes e persoas. “Buscaba algo tipo cómic, moi alegre, que tivera movemento, a través das cintas e as flores, cos sombreiros como protagonistas porque visualmente foi o que máis me chamou a atención deste Entroido” -sinala-. “Paréceme xenial a idea de introducir a ilustración nun produto tan familiar como é o leite” -salienta-.
Sorteo en Instagram
Durante a campaña sortearanse vasiños para levar, ilustrados tamén coas imaxes destes Entroidos realizadas polos tres artistas. Para conseguir un destes agasallos, cómpre subir a Instagram unha fotografía coa caixa que máis lles guste a cada un, etiquetar a @feiracolacteos e engadir o cancelo #entroidofeiraco. Así, todos os participantes entrarán nun sorteo.