En marcha unha campaña para potenciar a imaxe de Ribeira e fortalecer o orgullo de pertenza ao territorio: Lucir Ribeira

08 Febreiro 2023

O Concello de Ribeira puxo en marcha unha campaña para difundir ante a veciñanza do municipio as actuacións e melloras realizadas no marco da estratexia EDUSI Máis Ribeira Atlántica. A campaña, presentada baixo o lema Lucir Ribeira, ten o obxectivo de “ofrecer unha imaxe real e actual da cidade e das parroquias”. Farao mediante iniciativas de proximidade que potencien o sentimento de pertenza ao dito territorio. Trátase, tamén, dun convite aos veciños para “levar Ribeira na pel” e a “ser parte activa no lucimento e na posta en valor dos seus lugares, recursos e atractivos”.

A veciñanza, protagonista

Segundo fixo saber o Concello, a veciñanza será a protagonista dunha campaña que terá ampla presenza nas redes sociais. Participarán nela ribeirenses de diferentes idades, lugares e profesións. Un deles é o parataekwondista catro veces campión do mundo Álex Vidal, que debutou nos Xogos Paraolímpicos de Toquio 2020, sendo o único representante de España na estrea desta nova disciplina. Tamén participan Mariví e María, remeiras do Club de Remo Náutico de Ribeira, e Marta Blanco, do Patinaxe Ribeira, gañadora da medalla de prata na Copa de Europa de patinaxe.

Outra veciña que aparece na campaña é Gloria Lijó, a primeira muller española en embarcarse na pesca de altura, nadadora premiada e actual presidenta do Centro Santa Uxía da Terceira Idade de Ribeira. E homes de mar como José Antonio Pérez Sieira, patrón maior de Ribeira e presidente da Federación Galega de Confrarías; ou Rubén Lijó, rescatador marítimo de Gardacostas de Galicia e persoa á fronte do proxecto Pegasus Rescue Team.

Ademais, o bailador e coreógrafo Fran Sieira; alumnos do Club Patinaxe Ribeira, Eizan e Marta; Anabel e Sara Sevilla, representando á Real e Ilustre Confraría da Dorna; Olegario Sampedro, presidente do Instituto de Mediación Educativa de Ribeira; e Manuel Reiriz Dios, presidente do Centro Recreativo de Artes, responsable do Museo Etnográfico de Artes e concelleiro, entre outras, da primeira corporación democrática 1979-1983, a piques de presentar as súas memorias.

Liñas de actuación da Estratexia EDUSI Máis Ribeira Atlántica

A Estratexia de Desenvolvemento Urbano Sustentábel Integrado (EDUSI) Máis Ribeira Atlántica 2020 conta cun orzamento global de 6.250.000€ e está co-financiada nun 80% polo Fondo Europeo de Desenvolvemento Rexional (FEDER), dentro do Programa Operativo Plurirrexional de España (POPE) 2014-2020.

A EDUSI Máis Ribeira Atlántica 2020 divídese en catro grandes liñas de actuación:

• Ribeira intelixente: o seu obxectivo é mellorar o acceso, uso e calidade das Tecnoloxías da Información e da Comunicación.

• Ribeira eficiente: busca favorecer a transición a unha economía con baixo nivel de emisión de carbono en todos os sectores.

• Ribeira turística: quere conservar e protexer o medio ambiente e promover a eficiencia no uso de recursos.

• Ribeira humana: dirixida a mellorar a inclusión social e a loitar contra a pobreza.

En total, máis de 15 actuacións conforman o proxecto da EDUSI Máis Ribeira Atlántica 2020. Algunhas delas están rematadas e xa están a ser usadas polos veciños e visitantes de Ribeira. O resto das actuacións atópanse en fase de execución ou previa licitación.

Unha das actuacións realizadas é a reordenación da avenida do Malecón, obra na que, entre outras melloras, creouse un carril bici e ampliouse a zona destinada a peóns.

Amais, materializáronse varias sendas que poñen en valor o patrimonio cultural, natural e turístico de Ribeira, como a implantación dunha senda costeira peonil entre Punta do Laño e Porto Fenicio ou a creación dunha senda turístico-fluvial polo río Pedrín.

No ámbito tecnolóxico, modernizouse a administración a través das TIC implantando solucións propias de Cidades Intelixentes, co obxectivo de ofrecer á cidadanía ferramentas que permitan realizar trámites administrativos máis áxiles e eficientes e novos servizos intelixentes que contribúan á dinamización social e económica do municipio.

Doutra banda, leváronse a cabo diversas actuacións dirixidas a mellorar a eficiencia enerxética na administración pública e a iluminación eficiente en zonas como o parque de Punta do Castro ou a franxa litoral entre Palmeira e Aguiño con luces LED. Tamén está prevista a renovación da envolvente térmica do Conservatorio de Música.

En canto á mobilidade, procederase á remodelación, humanización e pacificación do tráfico na fronte marítima e a rúa de Castelao en Aguiño, ao reforzo da rede de semáforos e á mellora da seguridade viaria peonil e ciclista en pasos de peóns.

Ademais, está a traballarse na creación do Novo Auditorio de Ribeira, ao que se dotará dun sistema intelixente de control e de telexestión, e no que se habilitará unha sala polivalente para a prestación de diversas actividades socioculturais, un vestíbulo con soportal exterior e unhas escalinatas/gradería.

Outro proxecto previsto consiste na rehabilitación dun edificio para albergar situacións transitorias de persoas en situación de vulnerabilidade.

O concello de Ribeira habilitou a páxina web Máis Ribeira Atlantica, na que se ofrecerá información detallada e actualizada sobre as diferentes actuacións levadas a cabo no marco do proxecto EDUSI.

Amais, publicaranse as novidades sobre as actividades e proxectos da EDUSI nas redes sociais, Instagram, Facebook e Twitter do Concello de Ribeira, ademais da difusión da propia campaña Lucir Ribeira nos medios de comunicación.

Outros artigos

Publicidade

Revista en papel

Opinión

“O falar das pedras”. Luís Celeiro

“O falar das pedras”. Luís Celeiro

O falar das pedras é moito falar. Din o que saben, o que pasaron e o que será. As pedras gardan as mensaxes do tempo, as raias dos anos, dos miles e millóns de anos e cóntannolo aos que as escoitamos, aos que as miran e as queren. Millóns de anos escribindo e deixando...