As Súas Maxestades de Oriente teñen argallado en Porto do Son un percorrido que os vai levar por todas as parroquias (dez) do termo municipal ao longo da xornada do 5 de xaneiro. Isto polo que respecta ao percorrido oficial que xa comunicamos os días pasados dende O Barbanza. Ademais, farán paradas especiais en Baroña (onde a veciñanza, a través da Comisión de Festas de Baroña 2023, vai recibir ás Súas Maxestades a partir das 17.00, cunha gran cita festiva onde non faltarán “sorpresas, animación e mesmo un percorrido polas aldeas”) e máis en Portosín. Nesta última vila, a Asociación de Empresarios (AEP) e a Confraría de Pescadores San Andrés de Portosín xuntaron forzas para facer posíbel a chegada por mar da comitiva real, a partir das 16.30. Os Reis Magos farán un percorrido pola vila e logo achegaranse ao local da Confraría onde recibirán á cativada e desfrutarán dunha chocolatada. A festa virá acompañada da vertente musical de DJ Machito GT.
Periplo polo concello
O periplo da comitiva real visitará todas as parroquias do termo sonense durante todo o día e rematará na fachada marítima da vila sonense, acompañada (e acompañando) da ruada A Raíña do Nadal. Dende o Concello recomendan á veciñanza que tomen nota dos horarios aproximados do itinerario e as súas paradas.
#Miñortos / Igrexa >>> 10:00h – 10:20h
#Portosín / Praza do Curro >>> 10:35h – 11:00h
#Nebra / Local da Comunidade de Montes >>> 11:30h – 12:00h
#Noal / Fronte á fonte de Cabanela >>> 12:20h – 12:40h
#Baroña / Bar 85 >>> 13:00h – 13:15h
#Queiruga / Casa da Cultura >>> 13:30h – 14:00h
#Caamaño / Casa da Cultura >>> 16:00h – 16:30h
#Xuño / Casa da Cultura >>> 16:45h – 17:10h
#SanPedro / Casa da Cultura >>> 17:25h – 17:50h
#PortoDoSon / Comezo da ruada ás 18:10h
Nota importante: O Concello explica tamén que “debido á estrutura do vehículo, só se realizarán paradas nos puntos de encontro indicados. As nenas e os nenos que o desexen poden entregar as súas cartas ás Súas Maxestades nos puntos de encontro establecidos”. Dende o Consistorio tamén aconsellan seguir a información publicada nas redes sociais “por se houbera que facer algunha puntualización en función do tempo que teñamos ese día”.
