A conselleira de Política Social e Xuventude, Fabiola García, estivo este luns 16 de xaneiro na nosa comarca con motivo de comprobar o funcionamento das aulas do maior de Aguiño, iniciativa financiada polo seu departamento a través dun acordo de colaboración co Concello de Ribeira que mobilizou 60.500 euros. As aulas, activas dende hai tres meses, dan servizo xa a preto de 70 persoas. Organízanse obradoiros de novas Tecnoloxías da Información e a Comunicación (TIC), talleres de exercicio físico e actividades de alfabetización, entre outras accións. “Trátase dun conxunto de actividades que permiten favorecer un envellecemento activo e unha aprendizaxe continua”, sinalou a ribeirense Fabiola García.
Amais, salientou que as aulas levan en funcionamento tres meses e que, neste tempo, “demostraron ser un servizo necesario que repercute nunha mellor calidade de vida das persoas maiores”.
Por outra banda, a conselleira de Política Social e Xuventude anunciou que a Xunta de Galicia incrementará as horas do Servizo de Axuda no Fogar á disposición do Concello de Ribeira e “coa finalidade de continuar ampliando a atención a domicilio dos veciños de máis idade”.
Ademais, informou que están a piques de rematar as obras de demolición da antiga discoteca Hesta Kurba, onde se emprazará a nova residencia pública autonómica de maiores do Barbanza, que será, engadiu, “o primeiro centro no que se aplicarán as innovacións do novo modelo residencial”. Segundo detallou, nas vindeiras semanas procederase á publicación da licitación da redacción do proxecto básico de execución para a construción desta residencia que conta con 10 millóns de euros de orzamento e 100 prazas que se distribuirán en módulos de convivencia de 25 residentes.
