Neste punto de inflexión entre 2022 e 2023 comezaron no concello de Porto do Son os traballos para dotar de saneamento o núcleo de Mantoño, na parroquia de Goiáns, cun investimento total que vai máis alá dos 193.000 euros. O Concello compartiu nas redes sociais imaxes das tarefas que se están a realizar este mes de xaneiro, que, como se pode comprobar, xa acometeron a instalación das canalizacións nalgunhas rúas do devandito núcleo.
O proxecto inclúe o subministro dun colector principal de saneamento e 5 colectores secundarios cos seus pozos de rexistro e 23 acometidas domiciliarias. O Concello confirmou o ano pasado a súa intención de aproveitar o levantamento do firme para substituír o asfalto por materiais máis acordes coa feitura do núcleo tradicional e histórico de Mantoño, con formigón e lastras.
