O mes de xaneiro vai rematar con novidades relativas ao proxecto Friendship-Orca, do que vén de abrollar a web orcaiberica.org e cuxo obxectivo é achegar cumprida información sobre as candorcas, sobre como actuar en caso de atoparnos con elas nunha travesía marítima e sobre o seu comportamento, os seus hábitos e a súa presenza nas nosas costas. O venres día 27 de xaneiro o proxecto reuniu a sete artistas no Museo de Historia Natural-MHN da Sociedade de Historia Natural-SGHN de Ferrol, coa finalidade de empaparse de datos actualizados á hora de xerar materiais divulgativos sobre os mamíferos mariños e o mar, materiais que serán publicados na dita web.
Formaron parte do equipo: Pepe Carreiro, debuxante de banda deseñada e ilustrador, creador das personaxes Os Bolechas; Emma Ríos, debuxante de proxección internacional; Manel Craneo debuxante, ilustrador e editor, creador de Carmela Orzán detective ambiental; Sara Bermúdez (Kitty Poisson), debuxante e ilustradora de xogos dixitais e de rol; Víctor Tizón, debuxante e ilustrador; Tokio, debuxante e ilustrador científico; e Aldán López actor, director de teatro e xestor cultural. Ademais contaron coa coordinación, guía e asesoramento de Mónica González bióloga da CEMMA e Xan Silvar biólogo e coordinador da SGHN de Ferrol.
O proxecto Friendship-Orca, levado a cabo pola Coordinadora para o Estudo dos Mamíferos Mariños-CEMMA e o Grupo de Traballo Orca Atlántica-GTOA está financiado pola Fundación Santander.
