O Concello de Ribeira vén de tomar medidas coa apertura dun expediente sancionador á empresa adxudicataria do subministro e instalación do alumeado de Nadal, ante os reiterados incumprimentos das condicións recollidas nos pregos de condicións que rexen este contrato.
Neste senso, os servizos técnicos municipais detectaron unha serie de incumprimentos que teñen que ver sobre todo cos prazos e cos elementos a instalar nos diversos lugares e parroquias, incluíndo o casco urbano.
Hai que recordar ao respecto que o Concello fixera este ano un significativo incremento no orzamento dedicado á iluminación (máis de 11.000 euros de diferencia con respecto ao ano pasado) coa ilusión de conmemorar de forma especial as primeiras festas de Nadal pospandemia.
Dende o Concello pídese desculpas polo malestar ocasionado entre moitos veciños e veciñas, confiando en que esta situación se poida ver regularizada nos próximos días.
