O BNG emprazou ao Goberno do PP a “cumprir a decisión unánime da Cámara” para instar ao Goberno central a recoñecer o coeficiente redutor de xubilación do persoal traballador do servizo de Gardacostas e de Pesca de Baixura, así como a inclusión do colectivos dos e das Gardacostas no Réxime Especial do Mar.
En palabras da portavoz de Pesca dos nacionalistas, a pobrense Rosana Pérez, “o Goberno do PP presume de nomes pero non actúa e non coñecemos que actuacións levou a cabo, mais si coñecemos a resposta do Instituto Social da Mariña (ISM), dependente do Goberno central, que emprazaba á Xunta a presentar un estudo onde se corroborase a sinistralidade, perigosidade, riscos e incidencia en procesos de incapacidade temporal que implican traballos como o do Servizo de Gardacostas para poder xustificar a a súa inserción no Réxime Especial dos Traballadores do Mar”.
“Hai moito tempo que vimos solicitando á Xunta que faga as xestións necesarias para que o servizo de gardacostas e os Mostradores do Mar se beneficien do coeficiente redutor da idade de xubilación”, recriminou a deputada do BNG á bancada Popular, á que lembrou o acordo unánime acadado na Cámara para que o Goberno do PP instara ao Estado a incluír ao persoal traballador do servizo de Gardacostas no citado Réxime Especial. Ademais, dixo, este acordo unánime incluía a inserción nesta mesma clasificación do persoal da Unidade Técnica de Pesca de Baixura, e a petición para este gremio do beneficio do coeficiente redutor da idade de xubilación.
“Temos este tema parado dende hai anos, malia ter un acordo xa tomado”, criticou Pérez, que emprazou ao PP a “cumprir non só o acordo unánime da Cámara galega, senón tamén a recorrer a resolución do ISM e demandar a inclusión dos e das Gardacostas e da UTPB no Réxime Especial”. Ademais, demandoulle comezar os estudos requiridos polo ISM para “xustificar mediante o informe requirido a aplicación nestes dous eidos de traballo dos coeficientes redutores para a idade de xubilación”.
