O Concello de Ribeira, coa finalidade de mellorar a accesibilidade no paseo do Malecón e das Carolinas, vai proceder á renovación do pavimento do carril bici. Farao mediante un tratamento a base de morteiro de slurry en cor verde “Desta maneira”, explican dende o Executivo local, “o espazo reservado ao tránsito de bicicletas estará perfectamente diferenciado das zonas de uso peonil, como establecen as recomendacións existentes en materia de accesibilidade (e como viñan demandando tamén algúns usuarios), xa que contará cun pavimento distinto tanto en cor como en textura superficial”.
Ademais, este pavimento será anti-deslizante e facilmente identificábel, e “estas características contribuirán a mellorar a seguridade viaria na zona”, engadiron fontes do Concello.
A actuación, que abrangue unha superficie de 3.013 metros cadrados, foi adxudicada á empresa Rinol Rocland Suesco, SL, e comporta un investimento de 46.738,26 euros, IVE incluído.
