O Concello de Ribeira informa da adxudicación das obras dirixidas á mellora do firme no camiño da Eirexa a Gándara e máis no camiño de Meiladín, que están situados nas parroquias de Oleiros e Olveira, respectivamente.
En ambos lotes, a empresa adxudicataria resultou a empresa Construcciones Ponciano Nieto, S.L., por cadanseus importes de 28.239,62 e 34.934 euros, respectivamente. A actuación conta cunha subvención da Axencia Galega de Desenvolvemento Rural (AGADER) ao abeiro do Plan de Mellora de Camiños Municipais de Acceso a Parcelas Agrícolas 2022-2023.
No que camiño da Eirexa a Gándara, de 660 metros de lonxitude, ten un firme de aglomerado asfáltico deteriorado. As obras de mellora previstas contemplan a roza e limpeza da vexetación, a aplicación dunha subbase de saburra, a regularización do camiño con aglomerado en quente nas zonas de fochas e esconchados, e a extensión dunha nova capa de aglomerado en quente de cinco centímetros de espesor en toda a lonxitude e ancho da vía.
No que se refire ao camiño de Meiladín, de 445 metros de longo e feito de aglomerado asfáltico, o Concello fai saber que o “seu estado de conservación tamén é defectuosa”. As obras de mellora prevén a roza e a limpeza da vexetación, a preparación das marxes do camiño, a regularización do mesmo botando aglomerado en quente nas zonas de fochancas e esconchados, a aplicación dunha subbase de saburra nas marxes e a extensión dunha capa de aglomerado en quente de cinco centímetros de espesor en toda a lonxitude e ancho da vía.
O prazo de execución nun e outro caso é dun mes.
