O vindeiro domingo 16 de outubro ás 12:00h, a Asociación Española de Esclerose Múltiple (AEDEM-COCEMFE) celebrará o final da súa campaña cun acto institucional e un concerto no Hotel Congreso. No evento reivindicaranse os dereitos que esixe o colectivo, a través da lectura dun Manifesto a favor das persoas con esclerose múltiple, no que se destacará o recoñecemento automático do 33% de discapacidade co diagnóstico da esclerose múltiple e outras enfermidades neurodegenerativas.
En opinión de Pedro Custa Aguilar, Presidente de AEDEM-COCEMFE (Asociación Española de Esclerose Múltiple), “é urxente e necesario o recoñecemento automático dun grao de discapacidade mínimo do 33% para as persoas con esclerose múltiple, a gran maioría delas moi novas no momento do seu diagnóstico, para acceder canto antes ás medidas de apoio e protección social que garantan o mantemento da súa calidade de vida e saúde emocional.”
Este acto contará coa presenza de D. Fernando González Abeijón, Director Xeral de Maiores e Discapacitados da Xunta De Galicia, Dna. Milagros Castro Sánchez, Concelleira de Políticas Sociais do Concello de Santiago de Compostela, e D. Anxo Queiruga Vila, Presidente de COCEMFE (Confederación Española de Persoas con Discapacidade Física e Orgánica) e Presidente de COGAMI (Confederación Galega de Persoas con Discapacidade).
Un acto que terá tamén un compoñente festivo e de encontro, co concerto do grupo Os mecánicos e cunha comida de confraternización á que asistirán persoas afectadas das cinco asociacións galegas.
