O temporal “Beatrice” deixou un importante reguero de incidencias na comarca de Arousa o que obrigou aos equipos de emerxencias a redobrar esforzos desde as sete da mañá ata o mediodía deste domingo.
Unha delas produciuse na ponte interprovincial de Catoira, que estivo pechado ao tráfico desde a unha da tarde. Fontes de emerxencias indican que se levantaron algunhas dos ferros da cuberta da zona de paso peonil, polo que un equipo do GES de Padrón procedeu a cortar o viaduto nos dous sentidos.
Os vehículos que circulaban entre Rianxo e Catoira deberon dar a volta en Pontecesures.
O 112 Galicia rexistrou hoxe máis de trescentas incidencias por meteoroloxía adversa
A maioría delas estiveron relacionadas coa presenza de árbores ou polas nas estradas, que comprenderon 196 do total de 331 incidencias rexistradas debido aos fenómenos de meteoroloxía adversa presentes na comunidade durante o día de hoxe, entre as 00:00 e as 12:59 horas.
En canto as diferentes provincias, a de Pontevedra foi a máis damnificada con 198 sucesos rexistrados en total. Na da Coruña contabilizáronse 98; en Ourense, 22; e en Lugo, unicamente 13.
Ademais, no período comprendido entre as 10 e as 12 horas desta mañá xestionáronse máis dun cento de incidencias.
