Preto de 40 unidades afrontan este sábado a subida ao Carrumeiro no Trofeo Pitusa Sabín

Juan Caballero.- O Real Club Náutico de Portosín tivo que pendurar o cartel de completo no referente á participación no Trofeo Pitusa Sabín – Regata Mar de Finisterre. Fíxoo unha mariña deportiva a rebordar que, entre os barcos da súa masa social, os tránsitos e as case corenta embarcacións do Mar de Finisterre fai encaixe de palillos para acomodar nos seus pantaláns ao gran número de embarcacións que estes días poboan as súas instalacións, cunha mariñeiría a pleno rendemento e vivindo unha das súas mellores tempadas.

O veleiro Camping Ría de Arousa

O aliciente de ser, por segundo ano consecutivo, proba que puntúa para o Trofeo Presidente Xunta de Galicia, fai do Trofeo Pitusa Sabín – Regata Mar de Finisterre unha regata atractiva que navega entre o Trofeo Infanta Elena do Real Club Náutico da Coruña e o Trofeo Príncipe de Asturias, do Monte Real Club de Iates de Baiona, co engadido de ser tamén puntuábel tamén, de maneira conxunta co Real Club de Mar de Aguete, para o Campionato de España de Cruceiros e para a Copa de Galicia de Clubs que organiza a Real Federación Galega de Vela.

A primeira proba dispútase este sábado, cun trazado costeiro de 40 millas náuticas, un 74 quilómetros entre Portosín e a enseada de Fisterra, de ida e volta, facendo paso intermedio polo Faro do Carrumeiro Novo, moi próximo á boca de entrada da ría de Corcubión. Os máis pequenos realizarán un percorrido polo interior da ría dunhas 10 millas, un 18 quilómetros, sendo a súa metade de percorrido unha boia fondeada nas inmediacións da praia de Arnela.

A este cita co Trofeo Presidente chega líder o Mirfak, patroneado por Diego López, da Comisión Naval de Regatas de Ferrol, da Armada Española, do mesmo xeito que en 2021.

Outros barcos que se suman ao Trofeo Pitusa Sabín son o Siradella, de Fernando Gude e César Álvarez, do Real de Portosín; o Urbapaz, de Fran Edreira, do Club Náutico Cabanas; o Raygras III, de Tom Núñez, do Club Marítimo Carrumeiro; o Cámping Ría de Arousa, de José Manuel Pombar, do Club Náutico Arousa Norte; o Ronáutica Marinas, de Jorge Carneiro, do Club Náutico San Telmo; o Orión, de Javier Pérez, do Monte Real Club de Iates de Baiona; ou o Kanala, de Ignacio Ecenarro, de Portosín, entre moitos outros que representan os intereses de máis dunha decena de entidades náuticas e deportivas de Galicia.

O top de saída, en ambas as xornadas da fin de semana, está programado ás 12.00 horas do mediodía.