O deputado do BNG no Congreso, Néstor Rego, rexistrou iniciativas na Cámara Baixa para coñecer o estado actual da normativa que está a elaborar o Ministerio de Agricultura, Pesca e Alimentación e que vai a afectar ao regulamento das nasas no mar. Rego demanda “a rectificación inmediata” da proposta do Executivo estatal por “invadir competencias titularidade da Xunta da Galiza” e “ante a preocupación do sector pesqueiro galego pola prohibición de deixar as nasas caladas no mar”. A organización volveu salientar a necesidade de que se transfiran a totalidade das competencias en materia de costas á Administración galega, tal e como vén de aprobar o Consello de Ministro para o Goberno canario.
A respecto do devandito, o BNG explica que o Ministerio de Agricultura, Pesca e Alimentación pretende estabelecer a prohibición de deixar caladas no mar as nasas e outras artes de pesca no Real Decreto polo que se regulará a pesca en caladoiros estatais. Os nacionalistas, facéndose eco da inquietude das confrarías, sinala que a normativa “podería pretender que os pescadores retiren do mar as nasas que utilizan na campaña de captura do polbo durante dous días cada semana”.
E engaden: “A pretensión do Ministerio supón unha flagrante intromisión nas competencias da Xunta da Galiza que é a que exerce as responsabilidades en materia de marisqueo e acuicultura”. En palabras do deputado do BNG, “as competencias en augas interiores pertencen ao Goberno autonómico que, na súa lexislación, permite deixar as nasas no mar o tempo que duran as campañas”. O BNG tamén destaca que existe “un compoñente de prevención de riscos na normativa galega ao permitir deixalas caladas no mar, debido a que nas lanchas aumentan o seu peso e en días de mal tempo contribúen á inestabilidade das barcas”. Por iso é “polo que se autoriza a deixalas caladas toda a semana” xustifica Rego.
