Tal e como sae anunciado no BOP deste 6 de xullo sométese a exposición pública a aprobación do regulamento de funcionamento da nova Mesa de Mobilidade de Ribeira, que vén substituír á anterior mesa de peonalización ampliando os seus membros e obxectivos. De acordo co seu texto inicial, o carácter deste órgano de participación é “informativo e consultivo”, tendo como función principal a de “asesorar ao Concello no concernente ao deseño das súas políticas de mobilidade”. Amais, unha das súas funcións principais é a de facilitar a información necesaria aos seus integrantes que permita ter o maior coñecemento posíbel sobre a mobilidade, e fomentar a deliberación como paso previo ao debate.
A Mesa da Mobilidade está formada polo plenario e polas comisións de traballo que se consideren. O plenario é o órgano motor da Mesa da Mobilidade, que procura o seu funcionamento: é o espazo onde se poñen en común os resultados da actividade das diferentes comisións de traballo (conclusións, propostas, etc.) para o seu debate e, se cadra, a súa aprobación. Estará formado polos seguintes integrantes permanentes:
• Presidente: alcalde/sa.
• Vicepresidente: concelleiro/a de Medio Ambiente, tráfico ou persoa na que delegue.
• Secretario: secretario/a do Concello ou técnico/a de administración xeral no que delegue.
• Concelleiros/as de Infraestruturas, Urbanismo, Educación, tráfico e Protección civil, Promoción e dinamización económica
• Técnicos/as municipais ligados a cada unha destas áreas ou concellerías.
• Policía Local.
• Un/a concelleiro/a ou representante de cada un dos grupos políticos da Corporación.
• Un/a representante das asociación de veciños.
• Presidente/a da Asociación de Empresarios e Comerciantes.
• Un/a representante dos sindicatos.
• Presidente/a Asociación de Taxi.
• Empresas de transporte suburbano, interurbano e escolar con presenza na cidade.
• Concesionario do guindastre.
• Representante de aparcamentos públicos se houbese.
• Asociacións de persoas maiores.
• As Asociacións de PMRs do concello (Persoas con Mobilidade Reducida).
• Un/a representante de peñas ou clubs cicloturistas.
• No seu caso, expertos asesores en mobilidade urbana. Colexios Profesionais de Enxeñeiros de Camiños, Canles e Portos, e Arquitectura, e outros que a Corporación estime pertinente.
• Para o caso das asociacións, colectivos e colexios profesionais, a representación na Mesa estará confiada a un titular por cada colectivo e a un substituto ante a ausencia de aquel. As reunións do plenario serán presididas polo/a alcalde/sa, e en ausencia do mesmo, a persoa na que delegue.
Son funcións do plenario, entre outras, establecer/modificar as normas internas de funcionamento da Mesa de Mobilidade; definir e constituír as comisións de traballo que se consideren; definir os obxectivos xenéricos e específicos da Mesa de Mobilidade; e definir os obxectivos e o plan de traballo das diferentes comisións; amais de elevar os resultados do traballo das comisións e do mesmo plenario aos órganos do Concello para os cales a Mesa da Mobilidade debe ser un órgano asesor.
Aprobación definitiva do PMUS
Por outra banda, tamén sae anunciado no BOP a aprobación da revisión do Plan de Mobilidade Urbana Sustentábel de Ribeira, neste caso con carácter definitivo logo de ser resoltas as alegacións.
