Antón Luaces.- O vindeiro martes, 26 de xullo, estarán en vermello as axendas de todos os representantes do sector pesqueiro español. Será así ata que o comisario de Pesca comunitario, Virginijus Sinkevicius, dea por rematada a reunión técnica cos representantes das frotas pesqueiras europeas, os Estados membros con intereses neste eido (España entre eles), as ONG e os científicos do Consello Internacional para a Exploración do Mar (CIEM) para ultimar o “peche” de 87 zonas de pesca ao arrastre e ao palangre de fondo das augas de España, Francia, Portugal e Irlanda.
Este “peche” afectará á actividade de máis de 300 buques de pesca españois, segundo estimacións da Alianza Europea de Pesca de Fondo (EBFA, en inglés) que preside o galego Iván López.
Como dato importante para Galicia, compre salientar que as frotas de palangre de fondo dos portos de Burela e Celeiro obteñen nesas zonas cuxo peche se anuncia o 75% das capturas de pescada do pincho.
Estes temas xa foron tratados no “Informe do Sector Pesqueiro Español 2022” elaborado por Cepesca como cada ano. O secretario xeral desta entidade, Javier Garat, advertía días atrás que de seguir así os prezos do gasóleo mariño e as axudas non se produzan, “algunha frota terá que parar”. Garat confía en que Bruxelas sexa sensible ao estudo socieconómico que presentará España con catos sobre o impacto económico desta medida para a frota e todo o tecido económico arredor dos portos.
Neste informe recóllense datos que España presentará en torno á pegada das artes de fondo, onde se atopan os ecosistemas mariños vulnerables e as zonas a protexer. Tamén se citan os métodos cartográficos utilizados pola Comisión Europea para determinar as zonas pesqueiras a protexer. É precisamente a Comisión Europea quen ten a obriga de realizar este tipo de estudo, e non parece -a día de hoxe- que Bruxelas sexa proclive a introducir trocos, como recoñecía días pasados Iván López (EBFA) cando afirmaba que “non estamos para xogos: non creo que o conxunto da proposta se modifique”
