O PBBI reclama ao concello melloras na rúa da Capela, en Carreira

O Grupo Municipal Partido Barbanza Independente (PBBI) de Ribeira, a través do seu concelleiro e voceiro Vicente Mariño de Bricio, presentou ao pleno da Corporación municipal unha moción relativa ao estado no que se atopa o pavimento da rúa da Capela, en Carreira, que, segundo sinala a agrupación, é obxectivo de queixas por parte dos veciños da parroquia.

Segundo expresa o grupo, “trátase dun camiño que leva desde o ano 1994 na mesma situación, sendo o único movemento alí efectuado o realizado uns meses antes das eleccións municipais de 2019, cando o Goberno local mandou ao equipo de obras a repor o pavimento deteriorado, unicamente parcheando con asfalto certas fochas”. O PBBI, reflectindo as opinións da veciñanza, opina que estes traballos “non serviron para solucionar o problema, de feito, agravárono aínda máis, xa que o material utilizado levantouse debido a que estaba mal aplicado, constituíndo unha solución rápida que se utiliza moito nesta e outras parroquias, pero que aos veciños non lle beneficia, xa que se aplica cemento por encima de cemento”.

O PBBI lembra que se trata “dunha rúa moi transitada acotío e que actualmente está chea de fochancas e deficiencias estruturais, que provocan que os veciños teñan problemas tanto cos seus vehículos como de accesibilidade na devandita zona”.

En virtude de todo o exposto, o grupo insta o pleno da Corporación municipal de Ribeira á adopción dos seguintes acordos:

-Instar ao Concello de Ribeira a pavimentar con asfalto, ou outro material consistente, todo o ancho do camiño sen saída da denominada rúa da Capela.

-Instar ao Concello de Ribeira a que aplique unha nova capa de asfalto no viario central da rúa, desde o colexio até a igrexa da devandita parroquia.