O Castro de Baroña inicia o verán con recoñecementos e proxectos de mellora

O Castro de Baroña (Porto do Son) e os seus innumerábeis atractivos paisaxísticos, naturais e patrimoniais volveron estar esta tempada na primeira plana dos medios. Así, por unha banda a praia lindeira de Arealonga foi elixida polos lectores e colaboradores de Viajes National Geographic como o mellor areal dos 25 máis bonitos de España: a única presenza dunha praia galega en toda a clasificación de 25 xoias naturais costeiras, xunto coa da praia de Rodas nas Cíes.

Por outra banda, o Concello anunciou novos investimentos para sacar á luz máis segredos e fitos históricos do Castro de Baroña.

En concreto, veñen de rematar os traballos programados para este 2022 dende o Consistorio para consolidar e acondicionar estruturas. Estes labores, que tamén incluíron tarefas de escavación e de rexistro fotográfico e planimétrico, contaron cunha subvención da Xunta de 15.000 euros. Foron realizados por un equipo de arqueólogos coordinados polo investigador Tito Concheiro. Os traballos de escavación puxeron o foco na área sur do segundo recinto do castro, nun espazo de arredor de 80 metros cadrados. Amais, o Concello anunciou que está preparar xa a seguinte intervención no xacemento de Baroña: un proxecto de 50.000 euros asumidos polo Consistorio que se atopa en fase de redacción.