O Grupo Municipal Infantil de Teatro de Ribeira representou con gran éxito na tarde do venres
no Auditorio a función Que me vas contar, obra orixinal de Segundo Durán “Chiki” que estivo codirixida por este e por Óscar Romero.
Ademais da actuación (na que se escenificou un xuízo público ás acusadas de empregar faltas de ortografía nas mensaxes de móbil e redes sociais), diversos sketchs e pequenas pezas audiovisuais
serviron para render tributo ao falecido Daniel Gómez Ramil, e tamén se homenaxeou a Chiki Durán.
Antes de rematar tivo lugar a entrega de diplomas aos pequenos actores e actrices do elenco, poñendo remate ao curso 2021-2022.
A función, que está incluída dentro do Xuño da Cultura e as Artes, contou co apoio e colaboración de Carmen Peña, Nico González Pego, Manuel García e Unai González.
