A Casa da Cultura de Porto do Son acolleu este 26 de maio unha charla impartida polo profesor da USC e investigador Antonio Rial Boubeta, un dos grandes expertos dos ámbitos galego e estatal en metodoloxías para garantir usos racionais, útiles, seguros e rendíbeis das novas ferramentas dixitais. A sesión divulgativa para as familias Claves para educar @s nos@s fill@s nɑ erɑ dixitɑl (Previr para evitar adiccións) veu da man de CAFI Galicia, a Xunta (Consellería Cultura e Educación) e o Concello de Porto do Son.
O relator defendeu e reivindicou en Porto do Son as vantaxes das novas tecnoloxías para a nenez e a mocidade (para comunicarnos, para informarmos, para traballar, para enriquecernos) pero dende un punto de vista racional, controlado e supervisado.
Antonio Rial Boubeta, doutor e Psicoloxía, é autor dun informe recente de UNICEF, a USC e o CPEIG (Colexio Profesional de Enxeñaría en Informática de Galicia) no que se constata que un de cada catro adolescentes fai un uso problemático de Internet e as redes sociais. Esta investigación, arredor da que xirou parte do relatorio ofrecido en Porto do Son, témola dispoñíbel na páxina web da dita organización humanitaria.