No Son o Concello achegará preto de 479.000 euros para mellorar o saneamento en media ducia de núcleos

O Concello de Porto do Son compartiu información sobre os seus vindeiros traballos en saneamento no rural, traballos que van poñer o foco en Aguieira (sur), Nebra, O Pazo, Tores, San Pedro e Xosín e Orseño. En concreto, o pleno da Corporación deu luz verde a unha modificación orzamentaria con cargo ao remanente da tesourería que mobilizará un investimento de 478.536 euros para mellorar os servizos nos ditos lugares, aos que se suma Basoñas, onde o Goberno local habilitará dúas fosas filtro para a depuración de residuais, dando remate á rede de saneamento acabada de materializar.