Todo o que precisamos saber sobre unha cooperativa, nun curso en Porto do Son

Este martes o Concello de Porto do Son e o Espazocoop Unión de Cooperativas Galegas poñen en marcha unha acción formativa no ámbito do cooperativismo que busca divulgar e asentar novos e alternativos xeitos de producir e xerar riqueza: en colectividade, xuntando recursos e poñendo o foco no ben común. Trátase do programa E se traballamos en equipo, abeirado á colaboración que mantén o Concello coa Rede Eusumo – Economía Social de Galicia.

Celebrarase até o 8 de abril, en horario de 9.30h a 14.30h no Viveiro de Empresas de Porto Do Son. As persoas destinatarias son veciñas e veciños interesadas/os no emprendemento cooperativo, socias e persoal de cooperativas e público en xeral. O programa abordará os seguintes temas: como traballar nunha cooperativa, habilidades persoais e sociais, habilitades de comunicación, habilidades para o traballo en equipo e toma de decisións.