O Concello de Ribeira informou de que foron contabilizadas 82 ofertas para seis actuacións previstas en catro parroquias do municipio (Aguiño, Carreira, Corrubedo e Palmeira). A obra que acadou un maior número de propostas nas licitacións da media ducia de proxectos foi, con 16, a dirixida á instalación de rede de saneamento e abastecemento no lugar de Sampedro en Palmeira (orzamento base de licitación: 130.919,88 euros, con IVE).
A continuación, con 15, foi a pavimentación e renovación das redes de auga potable e pluviais na rúa Celso Emilio Ferreiro en Aguiño (189.765 euros).
Recibiron 14 ofertas tanto o saneamento, pavimentación e abastecemento no lugar de Frións en Carreira (154.081,94 euros) como a pavimentación, pluviais e saneamento nas rúas Chaprado e Ceboleira en Corrubedo (92.687,79 euros).
Tivo 12 propostas a ampliación da rede de abastecemento na avenida da Paz en Palmeira (54.598,56€). Por último, a pavimentación, saneamento e abastecemento en Braña do Muro en Aguiño (133.104,94 euros) contou con 11 ofertas.
